كل يوم عيدك حب ... ما نيش نستنى في فالونتان بش يعلمني نحبك و يعملي نهار نهديلك فيه و نوري حبي للناس ...

كل يوم نحبك ...
كل كلمة تخرج من شفايفي كان مش ليك راهي ليك ....
كل حلمة نحلمها مزينة بيك كان مش انت راهو خيالك ...
العباد تبسمل بش تاكل و انا ناكل باسمك ...
كل قطعة في بدني تسبح باسمك ...
دخان السيڨارو يصورلي وجهك ...

كل يوم نقرالك
درويش و القباني ...
الحلاج و الرومي ...
نغنيلك غنيات كاظم ؟
نبات ندندنلك بصوتي أحلى غنيات ...

هدا الكل ... زعما بش تعيشهم مع غيري ...
غيري ... ألي يستنى في فالونتان بش يقلك كلمة ترجع فيك الروح ....
غيري ... ألي كي الزير المتكي لا يضحك لا يبكي ...
قال شنوا اهديلها وردة ... و هي نار و نوّار ...
و الا شكلاطة ... يا دين امي فما شكون يهدي لشهدة ... شكلاطة ...

اي ماو نعرف باش تقولو مشحاح ...
اما ناس قبل يقولو : الي ما عندوش الفلوس في مذاهبو عندو العسل في لسانو ...
انا ما انجم نهديلك كان تبسيمة على شفايفك و ضحكة مالقلب ...
كلمتين نعصر عليهم جواجيا و نكتبهم بدم عروقي ...
نخلقلك كلام لا يفهمو لا جن و لا انس ...
جديد نبرى ... خير من دب تنزلو على ظهرو باش يقلك نحبك ....